®अधिवेशन वृत्तसेवा, कल्याण : कोरोनाच्या लॉकडाऊन काळात शहरातील अनेक झाडे पाणी व देखभाल अभावी सुकली किंवा नष्ट झाली. मात्र त्यानंतर Kalyan-Dombivli Municipal Corporation कडून त्या ठिकाणी नव्याने झाडे लावण्याकडे दुर्लक्ष झाल्याची तक्रार नागरिकांकडून व्यक्त होत आहे. शहरातील अनेक रस्ते, सोसायट्या आणि सार्वजनिक ठिकाणी पूर्वी असलेली झाडे लॉकडाऊन काळात सुकून गेली. काही ठिकाणी झाडे तोडली गेल्यानंतरही त्या जागी पर्यायी लागवड करण्यात आलेली नाही. परिणामी शहरातील हरित पट्टा कमी होत असून उष्णतेतही वाढ होत असल्याचे नागरिकांचे म्हणणे आहे.
पर्यावरण संवर्धनाच्या दृष्टीने महानगरपालिकेने शहरात मोठ्या प्रमाणावर वृक्षलागवड करणे गरजेचे असताना अद्यापही त्याबाबत ठोस पावले उचलली गेली नसल्याचे दिसून येते. त्यामुळे नागरिकांनी पालिकेने लवकरात लवकर शहरात नव्याने झाडे लावून हरित वातावरण निर्माण करण्याची मागणी केली आहे.
पर्यावरणप्रेमी आणि स्थानिक नागरिकांच्या मते, शहरातील रिकाम्या जागा, रस्त्यांच्या कडेला आणि सार्वजनिक ठिकाणी मोठ्या प्रमाणावर वृक्षलागवड केल्यास शहराचे पर्यावरण संतुलन राखण्यास मदत होईल. त्यामुळे पालिकेने याकडे गांभीर्याने लक्ष देण्याची गरज असल्याचे मत व्यक्त होत आहे.
