®अधिवेशन वृत्तसेवा/उल्हासनगर — शहरात झपाट्याने वाढत असलेल्या मटका जुगाराच्या प्रकरणांमुळे नागरिकांमध्ये तीव्र चिंता व्यक्त केली जात आहे. अंबरनाथ शहरातील काही भागांत अद्यापही मटका जुगार खुलेआम सुरू असल्याचे चित्र असून, यामुळे कायदा व सुव्यवस्थेचा प्रश्न निर्माण झाला आहे.
प्राप्त माहितीनुसार, शिवाजीनगर पोलीस ठाण्याच्या हद्दीतील ‘बॉम्बे हॉटेल’ पाठीमागे, कपिला बारच्या बाजूला बशीर मटण शॉपच्या पाठीमागे, तसेच एकता नगर, शिव मंदिर रोड परिसरात ‘बन्सी’ व ‘बबलू’ या नावाने मटका जुगार जोरात सुरू असल्याचा आरोप नागरिकांकडून करण्यात येत आहे. याबाबत स्थानिक वृत्तपत्रे तसेच शहरातील चर्चांमधूनही सातत्याने उल्लेख होत आहे.
जरी काही ठिकाणी पोलिसांकडून कारवाई करण्यात आली असली, तरी मटका जुगार पूर्णपणे बंद झालेला नसल्याने नागरिकांमध्ये नाराजी आहे. महाराष्ट्र जुगार प्रतिबंध अधिनियम, १८८७ अंतर्गत कलम ४, ५ व १२-अ अन्वये अनेक ठिकाणी गुन्हे दाखल करण्यात आले असूनही, अवैध धंदे पुन्हा सुरू होत असल्याचे वास्तव समोर येत आहे.
या पार्श्वभूमीवर अंबरनाथ शहराला मटका जुगारमुक्त शहर घोषित करण्याची जोरदार मागणी नागरिकांकडून होत आहे. यासाठी उल्हासनगर परिमंडळ-४ चे पोलीस उपायुक्त सचिन गोरे यांच्याकडे नागरिकांनी मोठ्या अपेक्षेने पाहिले असून, अवैध धंदे करणाऱ्यांविरोधात कठोर व कायमस्वरूपी कारवाई करण्याची मागणी केली जात आहे.
